اللي شفته من الغرايب كي مشيت نقّيد في قنصلية بلاد العجايب

كافتتاح لمدونتي الجديدة مدونة ولد الصحرا بديت بهذا المقال و اللي سبقت نشرته في الفايسبوك و اللي كان ليه الفضل اللي خممت نعمل مدونة, شوية تسخين بايت مع إضافة شوية بهارات و تحسينات! مرحبا بيكم 




يا سيدي بن سيدي على الرغم من اللي غاطس في ڨلب فترة الامتحانات هالنهارين أما هاني اخيرا مشيت قيّدت في القنصلية التونسية اليوم السبت! الله غالب كي التوانسة الكل ديما نكركر و نأجل لين ماعاد على أجل نهاية التسجيل كان 4 أيامات. الله غالب حاولت نتصل بالقنصلية كذا مرة و لكن لا من مجيب! شي حد ما يرد عالتليفون!بعد ما مشيت فهمت علاش!! (بعد ما كملت كتبت هالنص المحنون سمعت .اللي سماهم زادو في أجل التسجيل ل14 أوت! كالعادة حشوهولنا مرة أخى و لله الحمد!)

هكا هو ڨمت بكري – بتوقيتي انا طبعا هاها- وشديت التران ماشي للقنصلية في مدينة بون الألمانية!كي وصلت و هبطت من المترو اللي يوقف قريب من القنصلية اللي جاية في شارع مضخم و واسع في الحي الديبلوماسي بديت نلاحظ في الوجود التونسي من خلال العباد اللي ماشية للقنصلية و كانت ؟راكبة تى هيا في المترو و ما فقتش بيهم اللي هما زادة توانسة.

القنصلية هي عبارة عن فيلا مضخمة في قطعة أرض واسعة و مشجرة كانت قبل حسب ما سمعت مقر السفير التونسي في ألمانيا قبل ما تنتقل العاصمة الألمانية من بون إلى برلين بعد انضمام – أو إتحاد - جمهورية ألمانيا الشرقية الاشتراكية الشيوعية المزمّرة الله لا ترحملها عظمة مع الدولة الأم جمهورية ألمانيا الفيدرالية شهر المانيا الغربية قديما.

من اللي دخلت البوابة نتاع الفيلا و عفست في الجردا  بقيت باهت! عباد و عايلات و ناس وا ڨفة البرا في الجردة! و الصف في داخل القنصلية باين من بعيد! و الله فرحت في ڨلبي! قلت ماحلاهم التوانسة تبارك الله جايين يقيّدو و يقومو بالواجبّ!

انا ديما كي نمشي غادي نلڨاها فارغة, لكني أول مرة نجي في نهار سبت. نهار سبت يجو العباد الي تخدم أو العباد اللي تسكن بعيد على بون علاشي في ألمانيا فما كان 3 قنصليات: السفارة في العاصمة البرلين اللي جاية في الشمال الشرقي نتاع البلاد, واحدة في ميونخ اللي واقعة في الجنوب الشرقي و الثالثة في بون في غرب ألمانيا. لتوانسة الي ساكنين في بلايص أخرى الله غالب عليهم لازم يضربو جبدة لأقرب قنصلية ليهم بش يريڨلو أمورهم.

 هيا دكيت روحي و دخلت لبهو القنصلية و ين العباد شادة الصف ڨدام ال ڨيشي و عباد ڨاعدة عالطواول تعمر في مطالب التسجيل و أوراق أخرى! فوضى عارمة الحصيلو! وفي بلاصة تصاوير الزعبع و رسالة شباب تونس البنفسجي إلى شباب العالم و هاك البروباڨندا التجمعية المسخة ولو معلڨين ملصقات نتاع حملات الحج و العمرة و تصاور مكة و الكعبة و المدينة تڨول عليك في مكتب سفريات و رحلات حج وعمرة! ڨلت بلا ما نسإل نشد الصف كي العباد تو هاك الموظّف الهشوش البشوش  فالڨيشي يفهمني كل شي و نسألهم الأسئلة اللي شاغلة بالي حول التسجيل و الانتخاب و غيرها!

في الصف واحد شيّوبة ماركة ملللي جو في الستينيّات و السبعنيات بش يخدم كيد عاملة في المصانع الألمانية وا ڨف بحذايا و يحب يفوتنيفي الصف! شادد في إيديه زوز باسبورات و تصاور. ڨلت لروحي غريبة تصاور بش يقيّد بيهم؟؟ المهم وا ڨف بحذايا و عينيه تدور في راسه كي قرب الدور و شاف راجل كمل مل القيشي ديراكت ترمى عليه و هو يتلهمڨ و ريقته قريب تسيل! أه خويا بربي كيفاش المطلب توا؟؟ لوخر قاله أش تحب تعمل انتي ياخي؟ ڨاله نحب نجدد الباسبور نتاع الصّغار!!افاله لوخر عمر المطلب مع التصاور و زوز أورو!ياخي الشيوبة ڨاله أي عمرت وسايي !

مالا ربّك علاش تزيد تسأل؟؟؟!

 أيوا صار جاي يريڨل في الباسبور؟؟ بش يهبطو هو و العايلة لتونس في رمضان! و كي وصللي أنا الدور ڨد ڨد انتبهت لورقة معلقينها على يمين الباب كي تبدى جاي داخل للبنية بحيث الداخل من برا ما ي ڨدش يلاحظها! ما تنجم تشوفها كان كي تبدى ڨاعد الداخل! مكتوب عليها:

"التسجيل في القوائم الانتخابية في المكتب عدد 02" و سهم يشير للوطى أي للدور الارضي نتاع القنصلية! وقتها وين فهمت العفسة! العباد اللي معبيين الصالة و العايلات الواقفة البرا جايين يعملو في باسبورات جديدة و بطاقات تسجيل قنصلية و توكيلات و الخ!! لا تقييد و لاراس مازمبي!

كي هبطت اللوطة الحاصيلو نفس المنظر قابلنا! فاميليات و نسا و رجال ڨاعدين يعمرو في أوراق و مطالب و جو كبير! و في آخر الكلوار الطويل فما بصيص من الأمل! بيرو بابه محلول و الصف يوفى عنده و باين اللي فما تصير فيه حاجة تشبه للتقييد اللي نهار الكل يورونا فيه في تلافزنا التونسية اللي كلها ولت تتنافس عالوطنية! المهم فيسع ما عاودت استرجعت ثيقتي في وطنيّة و جدية و وعي مواطنينا في الخارج! بالفعل فما شكون جا يقيّد!

الحاصيلو وانا متعدي في الكلوار بش نشد الصف واحد تونسي قاعد يحكي مع جاره اللي قاعد بحذاه :

" تي المشكلة الكل في الدين! رانى بعدنا على الدين و هذاكا علاش صاير فينا هكّا! الدين كل شي! فيه كل شي! الأخلاق و التربية و العلم و اللي تحب عليه! عمركشي شفت واحد متدين ياخذ في الرشوة و الا يسرق؟؟؟ قليل جدا!!" و بحذاه شلة تونسيات مايد ان دجيرماني محجّبات و لابسين عباية شرعية كيما نتاع السعودية يحكو مع واحدة تونسية مش حاطة حجاب على حقوق المرأة في الاسلام و المرا اللي بلاش حجاب تحاول تفهم فيهم اللي كيافش دول كيما السعودية و أفغانستان راهم فاهمين الاسلام بالغالط و اللي الدين فيه حقوق المرا! مساكين غلّطوهم هالدول!! و انا نشوف في عجب ربي قدامي!

بالعربي نفخان مجاني للكرارز يا دين الـ*ب! كل مرة كي نقابل  شباب توانسة ما نعرفهمش لازم واحد يحلها خطبة دينية على مازمبي في تطبيق الدين و اللي هو الحل؟؟؟؟ تي أنا جاي نقيد بش ننتخب فماش نتخلصو من شبح قمع الحريّات تحت أي مسمى ديني أو غيره و بش نختار شكون يبنيلنا دولة مدنية العباد الكل تعيش فيها بلا خوف نسا و رجال على رواحها سواءا متدينين و الا زبراطة و الا خوانجية و الا لادينيين و حد ما يدبر على دين أمهم اش يعملو!! و لوخر يخرّفلي في حكاية كيف صـ**ـه!

اتجهت للبيرو اللي قد الحكة فيه زوز موظفين طلعو من السفارة لا هيئة عليا للانتخابات و لا سي وذني! موظفة سنيها ذكرتني في سنّين شيخنا الضحوك جدّااااا و موظف داززها شباب و كستيم و هو الشيب نايـ**ه شعره! لا و خاطيهم الانتماء للتجمع عاللخر و ماهوش صحنهم جملة! و نا واقف هكا وتدخل مرة من البيرو المجاور نسخة طبق الأصل من سيدة العڨربي!! ولابسة بالموف زادة! قلتش هربتشي الخرى من تونس وجو خبوها هنا في القنصلية! البيرو من ربي ذويّق كي الحكّا زيد دخلت هي ماهي رشيقة برشا تبارك الله تقطع علينا النفس! وبدا التقطيع و دقان الحنك بينها وبين الزويّز في البيرو ! تجي هكا  في نص الحديث تقوللهم: :الموظف في القنصلية يحبو يردوه عبد عند المواطن!! عبيد حنا ياخي!" برّا عاد! صار هي زادة تخدم هنا؟ علاش لا!!!

ياسيدي كي لاحظو وجودي مدولي زوز أوراق مطالب تسجيل واحد بالعربي و لوخر بالفرنسي! قلتلهم بربي لحظة! وبديت ندز في فازتي و عامل فيها ولد ڨـ**ـة:

-بربي عندي شوية أسئلة! مانحبش نعمر ورقة و نصحح فيها قبل ما نفهم أش صاير! باهي مش قلتو اللي الجالية التونسية في ألمانيا عندها مقعد كامل في المجلس التأسيسي؟؟ باهي و أنا يا سيدي كي ما نحبش ننتخب القوائم نتاع ألمانيا؟؟ نحب ننتخب قائمة في تونس؟

-  فما توانسة بش يترشحو بش يمثلو الجالية هنا و اللي يفوز منهم ياخذ المقعد نتاع الجالية في المجلس"!!

-  أي فاهمه هالشي أما نا نحب نعرف هل لازم نصوت لقوائم ألمانيا و لا ننجم نصوت لقوائم الولاية المقيّد بيها في بطاقة التعريف

- أي انتخب على روحك شكون شدك؟؟ انتخب أي قائمة في الجمهورية !!

- كيفاش كيفاش؟؟ ومالا التقييد الكل علاش صاير؟ ماهو على حكاية العناوين! علاشي كل ولاية عندها عدد من المقاعد و التقييد يفرض على التونسي أنه يصوت في دائرته الانتخابية اللي هي الولاية! مالا علاش فما تقييد أكتيف و باسيف؟ ماو على حكاية العنوان في بطاقة التعريف اللي غالبا يكون ڨديم و مش اكتيال! 

- حنا ما نعرفو حتى شي!! أتو كي تجي الانتخابات أتو نعرفو!

- لحظة السع! وشبيكم تخدمو بلاش لابتوبات؟؟ في التلفزة نهار الكل عبدونا بمنظر مكتب التسجيل باللابتوب و طابعة  و كابل ريزو و حالة!! وشبيكم مازلتو في الأنالوجيك ياخي؟؟"

- بما انا مشنا في تونس ما بعثولناش حد من هيئة الانتخابات بش يحط مطالب التسجيل سير بلاص في قواعد بيانات عبر الشبكة! ياخي هاكم انتم عمروها هنا و كي يبعثولنا واحد من تونس أتو يصبوهم هما بالاعلامية"!!!

- أيوا! صار هكا الحكاية! لا شي هايل و يبشر بكل خير الحق!!

و مديتله المطلب! ياخي شافه و بلا ما تأكد من صحة المعلومات بمقارنتها مع بطاقة التعريف و الباسبور  ڨال للمدام ذات الاسنان اللامعة: اناهو آخر نومري عملتيه؟؟ أه 1310؟؟ اوكي مالا شد ياسي ولد الصحرا هاو مطلبك رقمه 1311! و قيدلي النومرو عالوصل و مد هولي!في الاثناء المرا اللي تشبه لسيدة العقربي قالتلهم راو ما تحتي حتّى ورقة! أما حافظة المعلومات اللازمة! قالولها ياخي وشبيه؟ مافما حتى مشكلة! و كي يجو يوقعولها في الوصل قالتلها الموظفة وينه نومرو الباسبور؟ سيدة العقربي ردت عليها: أي تو نطلبك بعين بالتاليفون نمدهولك! 

هاكا هو! بالعربي طلعو عدد التوانسة اللي سجلو في قنصلية بون لحد اليوم 1300 كعبة فقط لا غير!!! و كي نحسبو اللي عدد التوانسة في ألمانيا على أقل تقدير 80000 نقولو يا سيدي  60000 منهم عندهم الحق يصوتو, معناهو نظريا كل قنصلية من الثلاثة في ألمانيا لازم يقيّدو فيها عالاقل 20000 تونسي!

و حكاية ألف تونسي وواش قيدو زدت تأكدت منها كي خرجت من القنصلية اللي هي صحيحة!!!

و هاك التوانسة اللي كانو شادين الصف ماكانوش حابين يدخلو لبيرو لتسجيل لكن للبيرو اللي بحذاه:

بيرو الحالة المدنية و الزواج!!

الحاصيلو أعز تفسير للحكاية هو الحديث الصحيح الّذي روي عن الأخ الشلنڨي وينڨي  :

التجمع يطهر والنهضة تعرس ... الديكتاتورية تلعب على عامل هام عند التوانسة وهو

الزبوب ....