هالتدوينة إهداء من الاخ العزيز سنورلاكس بن سالم....
________________________
أكيد ما يخفاكمش قداش كسرتلنا ريوسنا الترويكا بدعوتنا إلى تبني خطاب تهدئة يحل للحكومة ''في الجنة ذراع '' كيما نقولو ؛ قالك يحبو على هدنة ، يحبونا نحسنو النية ؛ يا سيدي مشات معاكم وهاني باش نحاول نشخص أزمة السلطة الحالية من غير ما ندس السم في العسل ولا نتبلى على '' الشرعية '' :
الإشكال الحقيقي اليوم إلي يخلي شعار الهدنة أسلوب مجانب للواقع يتمثل في تغطية النهضة لعجزها الإقتصادي خصوصاً بشيطنة الإعتصامات وتكفير من افترش الأرض والتحف السماء وسيب مصالحو باش يلقى موطن شغل أو حتى لإنعدام الماء الصالح للشراب في قريته ، مهوش من قبيل التجني أني نذكر هنا إتهام الصادق شورو للمعتصمين بمحاربة الله والرسول ''ضربة وحدة'' في مداخلة أقل ما يقال عنها أنها عدوانية ، السيد هذا ، إحتراماً لمستواه التعليمي على الأقل وقدرتو مبدئياً على التحليل ، يعلم جيداً أن هاته الإعتصامات في أغلبها موجودة من وقت الحكومات الثلاث بعد 14 جانفي متاع الغنوشي والسبسي ، معناها عيب انو يقول إلي فما شكون وراهم ولا يمول فيهم خاطر الإعتصامات هاذي كانت تمثل تحرك مشروع قبل 23 أكتوبر في نظر النهضة باعتبارها من ناحية '' تمظهر صحي '' لمخلفات '' الثورة '' على المدى القريب ومن ناحية أخرى دليل على عجز حكومة ما قبل '' الإستحقاق الإنتخابي '' على التعامل مع المعتصمين بالإستجابة ولا حتى بالتسويف في ما يخص مطالبهم ، نفس المطالب إلي بنت عليها النهضة برنامجها الإنتخابي الحالم القائم على الوعود بالتشغيل ، التشغيل ثم التشغيل ( كان نحسبو توا نفدو حتى هوما 500000 '' تشغيل '' ) ...
هنا أي نهضوي أو مؤتمري متحمس باش يجاوبني إلي الحكومة منتخبة ولازم نستنو خصوصاً إلي الحكومة عندها شهر ملي تكونت إلخ إلخ ، وخليني نبدا بحكاية الشهر المحنون ها التعلة إلي يساومو فينا بيها في كل تعليقاتهم :
لازم تفهمو إلي ماهيش مشكلتنا تأخر الترويكا في تشكيل الحكومة وتوزيع المناصب القيادية في الرئاسيات الثلاث ، منطقياً واجبكم تجاه الوطن بدأ بعد الإعلان الرسمي لنتائج الإنتخابات يوم 28 أكتوبر لذا ما تبدوش تصدرولنا في عثراتكم التفاوضية إلي خلتكم ما تشكلو الحكومة كان في ديسمبر ومن حقنا نبدو نحاسبوكم منذ أن تبينت الأطراف الفائزة في الإنتخابات . وشخصياً نشوف فيكم بوان مور لحد كتابتي هذه الأسطر ومن المستبعد انكم تبطلوا من المراهقة السياسية والتهرب من المسؤولية على الأقل في الأجل المتوسط ( القريب مشى على روحو ).
هاذي نقطة ، توا نرجعو لمطالبتكم لينا بالصبر والتفاؤل ، يا سيدي باللازمة نحنا والتوانسة الكل مستعدين نصبرو عليكم صبر أيوب لو انكم فقط تقدموا بوادر كافية على نضج خطابكم واحترامكم لعقولنا : توا في عوض ما النهضة تفهم إلي المعتصمين ما تنجمش تفضها معاهم بين عشية وضحاها وبلي كان باش تخونهم ولا تكفرهم باش تزيد تعمق الهوة بينها وبينهم ،و تعطيهم حق الإعتصام وتناديهم وتحاورهم ... في بلاصة هذا الكل يجو يتهموهم بالعمالة وبالزندقة والتآمر ؟؟؟ ويا ليتهم حتى غضوا الطرف عليهم ، لا نصبوهم أعداء الشعب ووقود الثورة المضادة !!! بأي منطق ينجم يكون النيل من الإعتصامات بادرة خير ورسالة طمأنة لواحد خرج قبل 14 جانفي ووصفتوه أنفسكم بالثائر الحر وتوا على خاطر مازال يخرج ومش ساكت يولي خائن من ازلام النظام ؟؟؟
صدقاً كنت نتمنى لو انو الصادق شورو ، بدل انو تخرج كشاكشو على القلالة المفقرين ، يخاطب النواب المحترمين و يقلهم انو الشعب هذا بالمؤيدين بالمعارضين بالمعتصمين أمانة في يدينا وعهد قطعناه على أنفسنا باش ما نخذلوهمش ، وما فيها باس مادامو شاطر في الإستشهاد بالقرآن يذكرهم بالآية الكريمة : '' وأوفوا بالعهد إن العهد كان مسؤولاً '' عسى انو مجلس الشعب يتوقف على المهاترات التخوينية والتكفيرية و ينادي '' بالشغل ، الحرية والكرامة الوطنية '' ها الشعار المقدس بالحق إلي منح النواب هاك '' الشرعية '' المحنونة وخلاهم يمدو وجوهم في وسائل الإعلام صباحاً مساءً ويوم الأحد ...
طبعاً ما نجمش نكمل حديثي من غير ما نعرج على موضوع الإنتهاكات المعنوية والجسدية لقواعد النهضة ، إفتراضياً وواقعياً ، في حق الصحفيين و المبدعين وحتى المواطنين العاديين : توا كيف حركة تمادى مناضلوها بالتطبيل لكفائتها التنظيمية وتناسق هياكلها إلي ما فتش في عضدهم لا النفي ولا الإقصاء ولا السجون ، كيف حركة بكل هاته المميزات ما تنجمش تؤطر قواعدها امالا شكون باش يأطرهم '' القواعد '' الهمج الاستئصاليين هاذومة ، نخلوهم سايبين وكل مرة نتنصلو من أفاعيلهم في بيانات أقل ما توصف به أنها هروب إلى الأمام ؟ مش وقتو توا باش تتحرك كوادر النهضة وتواجه الفروخ هاذي وتعلمهم إحترام فكر الآخر ومعتقدو وحقو في التنظم والإجتماع و خصوصاً ( 10 أسطر تحت خصوصاً ) حقو في معارضة أي سلطة حاكمة منتخبة كيما في أعرق الديمقراطيات في العالم ؟؟؟ شخصياً ما نجمش نبقى محايد كيف نشوف قيادات الحركة تعمل في ندوات حول تغسيل الميت والطب النبوي و تنسى أو تتناسى بالأحرى تقديم ندوات حول قبول الآخر وتكريس مفهوم المواطنة عند التونسيين والوئام المدني إلخ إلخ ، خاطر هذا يخليني نستخلص حاجتين : يا إما الكوادر المصونة مش حاسة بمأساوية الوضع و خطورتو و لا تتعمد التهرب من التأطير لحاجتين زادة : إما خوفاً من خسارة قواعدها كيف يعرفو إلي حركة النهضة هي حركة وطنية معتدلة بالأساس عندها علم تونس والنشيد الوطني والحرية كل الحرية من المقدسات بلا بلا بلا ، أو انو ها الكلاب السائبة تمثل الوجه الخفي للحركة ألقائم على سياسة العصا والجزرة أو بلغة أخرى '' نقتلو القتيل ونمشو في جنازتو '' ...
مخ الهدرة توا للداعمين '' للشرعية '' : ضاهرلي عرفتو توا إلي معارضيكم أبعد ما يكون عن التحامل اللا مبرر أو الحقد الأعمى المجاني ، لذا إذا كنتم عاجزين على الحوار الخالي من الثلب والشتم ، وهذا الواقع على الأقل بخصوص تسعة وتسعين فاصل منكم ، مذابيكم تمرو بسلام وكان تعملو مزية تلوجو على العجلة إلي إتهمتونا بوضع العصا فيها وإلا ،باش ما نقلكمش '' ديغاج '' ، '' تجمعو أسمائكم وتنصرفو '' و السماح دنيا وآخرة ...
أكيد ما يخفاكمش قداش كسرتلنا ريوسنا الترويكا بدعوتنا إلى تبني خطاب تهدئة يحل للحكومة ''في الجنة ذراع '' كيما نقولو ؛ قالك يحبو على هدنة ، يحبونا نحسنو النية ؛ يا سيدي مشات معاكم وهاني باش نحاول نشخص أزمة السلطة الحالية من غير ما ندس السم في العسل ولا نتبلى على '' الشرعية '' :
الإشكال الحقيقي اليوم إلي يخلي شعار الهدنة أسلوب مجانب للواقع يتمثل في تغطية النهضة لعجزها الإقتصادي خصوصاً بشيطنة الإعتصامات وتكفير من افترش الأرض والتحف السماء وسيب مصالحو باش يلقى موطن شغل أو حتى لإنعدام الماء الصالح للشراب في قريته ، مهوش من قبيل التجني أني نذكر هنا إتهام الصادق شورو للمعتصمين بمحاربة الله والرسول ''ضربة وحدة'' في مداخلة أقل ما يقال عنها أنها عدوانية ، السيد هذا ، إحتراماً لمستواه التعليمي على الأقل وقدرتو مبدئياً على التحليل ، يعلم جيداً أن هاته الإعتصامات في أغلبها موجودة من وقت الحكومات الثلاث بعد 14 جانفي متاع الغنوشي والسبسي ، معناها عيب انو يقول إلي فما شكون وراهم ولا يمول فيهم خاطر الإعتصامات هاذي كانت تمثل تحرك مشروع قبل 23 أكتوبر في نظر النهضة باعتبارها من ناحية '' تمظهر صحي '' لمخلفات '' الثورة '' على المدى القريب ومن ناحية أخرى دليل على عجز حكومة ما قبل '' الإستحقاق الإنتخابي '' على التعامل مع المعتصمين بالإستجابة ولا حتى بالتسويف في ما يخص مطالبهم ، نفس المطالب إلي بنت عليها النهضة برنامجها الإنتخابي الحالم القائم على الوعود بالتشغيل ، التشغيل ثم التشغيل ( كان نحسبو توا نفدو حتى هوما 500000 '' تشغيل '' ) ...
هنا أي نهضوي أو مؤتمري متحمس باش يجاوبني إلي الحكومة منتخبة ولازم نستنو خصوصاً إلي الحكومة عندها شهر ملي تكونت إلخ إلخ ، وخليني نبدا بحكاية الشهر المحنون ها التعلة إلي يساومو فينا بيها في كل تعليقاتهم :
لازم تفهمو إلي ماهيش مشكلتنا تأخر الترويكا في تشكيل الحكومة وتوزيع المناصب القيادية في الرئاسيات الثلاث ، منطقياً واجبكم تجاه الوطن بدأ بعد الإعلان الرسمي لنتائج الإنتخابات يوم 28 أكتوبر لذا ما تبدوش تصدرولنا في عثراتكم التفاوضية إلي خلتكم ما تشكلو الحكومة كان في ديسمبر ومن حقنا نبدو نحاسبوكم منذ أن تبينت الأطراف الفائزة في الإنتخابات . وشخصياً نشوف فيكم بوان مور لحد كتابتي هذه الأسطر ومن المستبعد انكم تبطلوا من المراهقة السياسية والتهرب من المسؤولية على الأقل في الأجل المتوسط ( القريب مشى على روحو ).
هاذي نقطة ، توا نرجعو لمطالبتكم لينا بالصبر والتفاؤل ، يا سيدي باللازمة نحنا والتوانسة الكل مستعدين نصبرو عليكم صبر أيوب لو انكم فقط تقدموا بوادر كافية على نضج خطابكم واحترامكم لعقولنا : توا في عوض ما النهضة تفهم إلي المعتصمين ما تنجمش تفضها معاهم بين عشية وضحاها وبلي كان باش تخونهم ولا تكفرهم باش تزيد تعمق الهوة بينها وبينهم ،و تعطيهم حق الإعتصام وتناديهم وتحاورهم ... في بلاصة هذا الكل يجو يتهموهم بالعمالة وبالزندقة والتآمر ؟؟؟ ويا ليتهم حتى غضوا الطرف عليهم ، لا نصبوهم أعداء الشعب ووقود الثورة المضادة !!! بأي منطق ينجم يكون النيل من الإعتصامات بادرة خير ورسالة طمأنة لواحد خرج قبل 14 جانفي ووصفتوه أنفسكم بالثائر الحر وتوا على خاطر مازال يخرج ومش ساكت يولي خائن من ازلام النظام ؟؟؟
صدقاً كنت نتمنى لو انو الصادق شورو ، بدل انو تخرج كشاكشو على القلالة المفقرين ، يخاطب النواب المحترمين و يقلهم انو الشعب هذا بالمؤيدين بالمعارضين بالمعتصمين أمانة في يدينا وعهد قطعناه على أنفسنا باش ما نخذلوهمش ، وما فيها باس مادامو شاطر في الإستشهاد بالقرآن يذكرهم بالآية الكريمة : '' وأوفوا بالعهد إن العهد كان مسؤولاً '' عسى انو مجلس الشعب يتوقف على المهاترات التخوينية والتكفيرية و ينادي '' بالشغل ، الحرية والكرامة الوطنية '' ها الشعار المقدس بالحق إلي منح النواب هاك '' الشرعية '' المحنونة وخلاهم يمدو وجوهم في وسائل الإعلام صباحاً مساءً ويوم الأحد ...
طبعاً ما نجمش نكمل حديثي من غير ما نعرج على موضوع الإنتهاكات المعنوية والجسدية لقواعد النهضة ، إفتراضياً وواقعياً ، في حق الصحفيين و المبدعين وحتى المواطنين العاديين : توا كيف حركة تمادى مناضلوها بالتطبيل لكفائتها التنظيمية وتناسق هياكلها إلي ما فتش في عضدهم لا النفي ولا الإقصاء ولا السجون ، كيف حركة بكل هاته المميزات ما تنجمش تؤطر قواعدها امالا شكون باش يأطرهم '' القواعد '' الهمج الاستئصاليين هاذومة ، نخلوهم سايبين وكل مرة نتنصلو من أفاعيلهم في بيانات أقل ما توصف به أنها هروب إلى الأمام ؟ مش وقتو توا باش تتحرك كوادر النهضة وتواجه الفروخ هاذي وتعلمهم إحترام فكر الآخر ومعتقدو وحقو في التنظم والإجتماع و خصوصاً ( 10 أسطر تحت خصوصاً ) حقو في معارضة أي سلطة حاكمة منتخبة كيما في أعرق الديمقراطيات في العالم ؟؟؟ شخصياً ما نجمش نبقى محايد كيف نشوف قيادات الحركة تعمل في ندوات حول تغسيل الميت والطب النبوي و تنسى أو تتناسى بالأحرى تقديم ندوات حول قبول الآخر وتكريس مفهوم المواطنة عند التونسيين والوئام المدني إلخ إلخ ، خاطر هذا يخليني نستخلص حاجتين : يا إما الكوادر المصونة مش حاسة بمأساوية الوضع و خطورتو و لا تتعمد التهرب من التأطير لحاجتين زادة : إما خوفاً من خسارة قواعدها كيف يعرفو إلي حركة النهضة هي حركة وطنية معتدلة بالأساس عندها علم تونس والنشيد الوطني والحرية كل الحرية من المقدسات بلا بلا بلا ، أو انو ها الكلاب السائبة تمثل الوجه الخفي للحركة ألقائم على سياسة العصا والجزرة أو بلغة أخرى '' نقتلو القتيل ونمشو في جنازتو '' ...
مخ الهدرة توا للداعمين '' للشرعية '' : ضاهرلي عرفتو توا إلي معارضيكم أبعد ما يكون عن التحامل اللا مبرر أو الحقد الأعمى المجاني ، لذا إذا كنتم عاجزين على الحوار الخالي من الثلب والشتم ، وهذا الواقع على الأقل بخصوص تسعة وتسعين فاصل منكم ، مذابيكم تمرو بسلام وكان تعملو مزية تلوجو على العجلة إلي إتهمتونا بوضع العصا فيها وإلا ،باش ما نقلكمش '' ديغاج '' ، '' تجمعو أسمائكم وتنصرفو '' و السماح دنيا وآخرة ...
